Францускиот интернационалец соопшти дека натпреварот против Специја во сабота ќе биде негов последен.
Франк Рибери преку социјалните мрежи го соопшти она што пред некое време го најави, само што не очекуваше дека ќе се случи толку брзо. Рибери официјално заминува во фудбалска пензија, на 39-годишна возраст.
„Топката ќе застане. Емоциите во мене, нема“, напиша Рибери.
Шпекулациите велат дека Французинот веднаш ќе добие улога во управувањето на клубот од овопј историски град на бреговите на Тиренското Море.
Рибери важи за еден од најдобрите играчи во новиот милениум. Се прослави на Мундијалот 2006 во Германија кога играјќи за Франција во одлично светло се претстави пред светот, по што наредната година следуваше трансфер во Баерн, каде и мина најголем дел од кариерата.
Родум од Булоњ, Рибери како дете почна во локалниот Конти, потоа замина во Лил, за да се врати во младинската школа на Булоњ каде и дебитираше на сениорско ниво. Следуваа авантури во Алес, Брест, Мец и Галатасарај, пред да се пронајде во Марсеј. По 12 сезони во Баерн дојде во Калчото во дресот на Фиорентина, а од минатата сезона ги брани боите на Салернитана.
Збогувањето на Рибери ќе биде в сабота од 15 часот на стадионот „Ареки“ во Салерно. Македонските љубители на Калчото овој натпревар ќе имаат можност да го гледаат на Arena Premium 3.