Поминаа седум години откако Ријана го издаде својот последен албум „Anti“, но тоа не ја спречува да соборува рекорди.
Добитничката на Греми е првата жена изведувач чии 10 песни достигнаа 1 милијарда стримови на Spotify – и покрај тоа што нема издадено албум од 2016 година.
Со рекордот се пофали на социјалните мрежи.
Веста за своето достигнување ја сподели на Instagram со коментар „Bad Gal billi“, што е всушност игра на зборови – billion (анг. милијарда) и името на нејзиниот профил Bad Girl Riri (лошата девојка Рири).
„Без нов албум“, додаде Ријана, која според годинешната листа на Forbes е прогласена за најбогата самореализирана пејачка и најбогата жена под 40 години во САД.
Ријана е добитничка на многубројни награди, а ова не е прв рекорд што го соборува. Таа има освоено девет Греми, 13 Американски музички награди и 12 музички награди Билборд.
Славната пејачка е сопственик на шест Гинисови светски рекорди. Пред 13 години стана единствената жена изведувач што имала четири сингла на прво место на американската топ-листа во една календарска година.
Ријана исто така е првата пејачка што имала синглови на врвот на британската топ-листа пет последователни години, од 2007 до 2011 година. За споредба, само Елвис Присли и „Битлси“ имаат повеќе.
