Кристијано Роналдо, најдобриот фудбалер на светот за 2017 година, изјави дека не очекувал да постигне еврогол на натпреварот со Јувентус.
„Голот беше сјаен, што можам да кажам... фантастично“, изјави Роналдо после мечот.
Португалецот со два гола и асистенција беше најзаслужен за големата победа на Реал Мадрид во Торино, во четвртфиналето од Лигата на шампионите.
Вториот гол на Роналдо беше еден од најубавите голови оваа сезона, откако после центаршут на Карвахал, Португалецот со „ножички“ ја испрати топката во мрежата на Буфон.
„Не очекував дека тој обид ќе биде гол“, рече Роналдо.
„Но, повеќе би сакал да зборувам за натпреварот кој беше одличен. Успеавме да постигнеме три гола против тим каков што е Јувентус. Секако дека сум среќен за победата на тимот и за своите два гола, ова беше одлична вечер“, изјави Португалецот.
Реал со победата во Торино практично си го обезбеди пласманот во полуфиналето, а реваншот во Мадрид се игра на 11 април.