Во 26. коло од Саудиската Про лига, Ал Наср победи со убедливи 8:0 на гости кај Абха, а брилјираше Кристијано Роналдо.
Португалецот го одигра само првото полувреме и успеа да постигне хет-трик, додавајќи две асистенции.
Првите два гола ги постигна од слободен удар, што не му успеваше 13 години. Последен пат двапати постигна гол од слободен удар на еден натпревар во 2011 година против Виљареал.
По головите во 11. и 21. минута, Роналдо потоа му асистираше на Садио Мане во 33. минута за 3:0, а потоа го постигна третиот гол во 42. минута со прекрасен лоб удар. Тоа беше негов прв хет-трик во дресот на Ал Наср во кариерата.
Маестралната партија ја комплетираше со асистенција за Абдулмаџид Ал Сулајхем во 44. минута за 5:0, па играта ја напушти на полувремето.
Во продолжението од натпреварот Ал-Наср постигна уште три гола против претпоследниот тим во лигата и остана со теоретски шанси за шампионската титула, иако 12-те бода зад лидерот Ал Хилал се тешко достижни.
Роналдо сезонава има феноменален учинок од 29 гола и 11 асистенции во Саудиската Про лига.