Поранешниот бразилски фудбалер Роналдо Луис Назарио Де Лима изрази тага и жалење за смртта на Диего Марадона, истакнувајќи дека Аргентинецот оставил неизбришлива трага во светскиот фудбал, но и во неговиот живот.
Бразилецот раскажа и една од многуте анегдоти од времето поминато со Марадона.
На прес-конференцијата, Роналдо како сегашен претседател на Ваљадолид, ја анализираше моменталната состојба во клубот и издвои време да му оддаде почит на Марадона, со кого беше голем пријател.
„Диего беше спектакуларен, среќен, весел и ни остави големо наследство во фудбалот. Сите бевме заљубени во него и загубата е тажна. Многу е тешко. Беше многу тажно да се слушне таа вест. Ме изненади. Тој ги смени животите на многу луѓе, беше инспирација и за мене и ние бевме многу блиски во последните 10-15 години“, рече Роналдо кој потоа раскажа една трогателна анегдота што ја одразува великодушноста и хуманоста на Марадона.
„Откако пристигна во Мадрид да ме посети и да гледа натпревар, влезе со два рачни часовника на себе. За време на вечерата ми објасни дека ќерка му му ги подарила двата и оттогаш ги нема извадено. На крајот вечерата ми подари еден од рачните часовници. Не сакав да го прифатам, не можев, но се налути што не прифаќав. На крајот морав да го земам и секогаш ќе го чувам како сувенир. Како потсетување за неговата великодушност и љубезност“, изјави легендарниот Бразилец.
Диего Марадона почина од срцев удар минатата среда на 60-годишна возраст, а ФИФА испрати писмо до сите национални фудбалски сојузи да оддадат почит на легендата на светскиот фудбал со едноминутно молчење во првенствените натпреварувања.