Руски суд нареди психијатриска евалуација на активистка на која ѝ се суди за објави на социјалните мрежи во кои ја критикувала руската инвазија на Украина, пишува Sky News.
Адвокатот на активистката Раиса Болдова за Радио Слободна Европа (RFE) изјави дека одлуката на судот во Башкортостан, која е донесена денеска, ги крши човековите права на неговата клиентка.
RFE известува дека полицијата почнала да ја истражува Болдова претходно оваа година, откако таа објавила критики за руската инвазија на социјалните мрежи.
Болдова е обвинета за „ширење лажни вести“ за руската армија, за што ѝ се заканува затворска казна. Да потсетиме, Русија од почетокот на инвазијата донесе нови закони кои и дозволуваат да ги прати во затвор сите јавни противници на руската инвазија на Украина.
На почетокот на овој месец, истакнатиот руски дисидент Илја Јашин беше осуден на 8,5 години затвор поради објавување видео на YouTube за руските воени злосторства во украинскиот град Буча во близина на Киев.
