Пензионираниот генерал на американската армија и поранешен шеф на ЦИА Дејвид Петреус смета дека руската војска направила три големи грешки за време на инвазијата на Украина.
Во интервју за Радио Слободна Европа, Петреус рече дека руската војска покажала некои слабости во последните месеци од војната.
„Русите целосно ги потценија украинските сили и ги преценија нивните. Не успеаја да ја наметнат својата идеја за војна и да ги подготват силите за извршување на таа кампања. Покрај тоа, тие немаа модерни телекомуникациски системи“, рече генералот Петреус.
Петреус, кој претходно беше директор на ЦИА и командант на коалициските сили во Ирак, рече дека Русите не ги обучувале адекватно нивните војници.
„Покрај тоа, тие не ги обучуваа своите војници, секогаш знаевме дека им недостасуваат професионални подофицери кои се столбот на нашите сили на Запад. Имаше многу грешки кои сами ги открија, некои очекувани, некои неочекувани“, смета Петреус.
Пензионираниот генерал истакна дека руските телекомуникациски системи се „едноканални“ и „нешифрирани“, што на Украинците и нивните сојузници им го олеснува следењето.
„Исто така, тие се со висока фреквенција, секој може да ги ‘собере’ со полициски скенер, за разлика од нашиот систем кој користи фреквентна модулација. Фактот што овие системи не се шифрирани е навистина бизарен со оглед на тоа колку тие инвестирале во модернизацијата на својата војска“, изјави Петреус.
Во еден од документите на американските разузнавачки служби објавени минатиот месец, официјални лица тврдеа дека Москва претрпе меѓу 189.500 и 223.000 жртви во Украина.
Минатата недела американскиот Институт за проучување на војната потврди дека Русија веројатно нема да може да издржи повеќе офанзиви во исто време.
Се очекува Украина да започне контраофанзива во наредните месеци за да ја врати територијата под руска окупација.
Петреус верува дека украинската контраофанзива веројатно ќе ги спречи руските напори да го зајакне или снабдува Крим преку југоисточна Украина.
