Ирската авиокомпанија Ryanair е загрижена поради дефектите во авионите на Boeing што ги идентификуваа американските регулатори во извештајот по инцидентите на компанијата Alaska Airlines на моделите 737 Max 9, изјави денеска извршниот директор на таа компанија Мајкл О’Лири.
„Загрижени сме бидејќи извештајот го нагласува лошиот производствен квалитет на Boeing, но не мислиме дека тоа влијае на нашата флота на авионите 737 или Max 8“, рече О’Лири.
Тој истакна дека на последните 12 авиони, кои Ryanair ги доби во периодот од октомври до декември, забележано е подобрување на квалитетот во споредба со претходниот период од оваа година, пренесе Reuters.
Додаде и дека не е сигурен дали зголемениот надзор на Федералната управа за воздухопловство (ФАА) во Сиетл ќе ги забави новите испораки на Boeing за Ryanair до крајот на јуни.
Според прелиминарниот извештај на американскиот Национален одбор за безбедност на транспортот (NTSB) објавен вчера, недостасуваат четири клучни завртки од затворачот на вратата што излета од авион Max 9 на Alaska Airlines за време на лет на 5 јануари.
Ryanair, најголемата европска авиокомпанија според бројот на патници и еден од главните клиенти на Boeing, нарача повеќе од 350 авиони Max во последниве години, но ниту еден од Max 9.