Американската војска во саботата за прв пат фрли хуманитарна помош во Газа, соопштија американски официјални лица, додека организациите предупредуваа на продлабочување на хуманитарната катастрофа во палестинската енклава.
Три авиони C-130 исфрлија повеќе од 35.000 оброци на територијата каде, според Обединетите нации, четвртина од населението е на чекор од глад. Палестинците на социјалните мрежи објавија дека пристигнуваат кутии со помош.
Белата куќа објави дека хуманитарниот воздушен транспорт ќе продолжи и дека Израел ја поддржува операцијата.
Во услови на скептицизам во врска со продолжувањето на преговорите за прекин на огнот во Египет во неделата, Министерството за здравство на Газа објави дека најмалку единаесет Палестинци биле убиени во израелски воздушен напад врз шатор во Рафах, јужниот дел на енклавата каде што побегнале повеќе од еден милион Палестинци.
Министерството објави дека уште 50 лица се повредени во нападот во болница во делот Тел Ал Султан во Рафах. Во нападот загинал лекар од болницата.
„Првиот удар директно го погоди шаторот каде луѓето бараа засолниште, шрапнели ја погодија болницата во која седевме јас и моите пријатели, преживеавме од чудо“, изјави за Reuters сведок од Газа.
Израелската армија објави дека нејзините сили убиле осум милитанти во Хан Јунис, од кои околу 20 во центарот на Газа и уште тројца во Римал, во близина на Газа.
Во Рафа има повеќе од милион Палестинци кои пристигнаа од другите делови на енклавата, уништена под налетот на израелската армија, во која загинаа повеќе од 30 илјади луѓе.
Американскиот претседател Џо Бајден се надева дека примирјето ќе стапи на сила до почетокот на светиот исламски месец Рамазан, кој започнува на 10 март.
Расте меѓународниот притисок за прогласување прекин на огнот. Обединетите нации предупредија дека четвртина од 2,3 милиони жители на Појасот се во опасност од глад. Според локалните жители и лекарите, во саботата биле убиени три лица кои барале храна во земјоделска област во северна Газа.
Тринаесет деца починаа од дехидрација и глад во изминатите три дена во болницата Камал Адван, исто така на северот од Појасот, објави Министерството за здравство на енклавата. Лекарите предупредуваат дека оваа опасност им се заканува на повеќе деца.
„Доколку детето треба да јаде три оброци дневно, а јаде само еден, очигледно е дека гладува и поради тоа е изложено на ризик од сите болести“, вели докторот Имад Дардона.
Бајден во петокот го објави американскиот план за транспорт на хуманитарна помош, еден ден откако голем број Палестинци загинаа додека примаа хуманитарна помош.
Здравствените власти во Газа соопштија дека 115 луѓе биле убиени од истрели од израелската армија, додека Израел ја отфрла таа бројка и тврди дека повеќето од жртвите биле прегазени.
