Соединетите Држави го прогласија Иран за „најголем воен поддржувач на Русија“, велејќи дека односите на двете земји „се загреале до целосно одбранбено партнерство“.
„Иран обезбедува невидено ниво на воена поддршка за Русија“, изјави портпаролот на Советот за национална безбедност на САД, Џон Кирби.
„САД видоа извештаи дека двете земји размислуваат за заедничко производство на смртоносни дронови“, додаде тој.
Австралија објави дека санкционирала тројца Иранци и една иранска компанија за испорака на дронови на Русија за употреба против Украина.
Неодамна беше нагласена соработката меѓу Русија и Иран, а Украина ја обвини Русија дека во нејзините напади користи ирански беспилотни летала.
Откако првично негираше дека испратила било какви беспилотни летала во Русија, блискоисточната земја подоцна призна дека испорачала некои, но уште пред инвазијата на Украина.
Кирби рече дека партнерството меѓу Иран и Русија во производството на беспилотни летала ќе биде штетно за Украина, соседите на Иран и меѓународната заедница.
„Русија се стреми да соработува со Иран во области како што се развој на оружје, обука“, рече тој, додавајќи дека САД стравуваат дека Русија има намера „да му обезбеди на Иран напредни воени компоненти“, вклучувајќи хеликоптери и системи за противвоздушна одбрана.
„Иран стана главен воен поддржувач на Русија...“, рече тој. „Русија користи ирански беспилотни летала за да ја нападне енергетската инфраструктура, лишувајќи милиони Украинци од електрична енергија, топлина, критични услуги. Луѓето во Украина, всушност, денес умираат како резултат на акциите на Иран“.
Како одговор на коментарите на Кирби, британскиот министер за надворешни работи Џејмс Клеверли рече дека Иран станал еден од главните воени поддржувачи на Русија и дека односот меѓу нив ја загрозува глобалната безбедност.
„Ужасните договори меѓу двете земји доведоа до тоа Иран да испрати стотици беспилотни летала во Русија“, рече тој.
Во саботата, австралиската министерка за надворешни работи, Пени Вон, во изјава рече: „Испораката на беспилотни летала за Русија е доказ за улогата што Иран ја игра во дестабилизирањето на глобалната безбедност. Оваа листа нагласува дека оние што ќе ѝ обезбедат материјална поддршка на Русија ќе се соочат со последици“.
Таа, исто така, најави мерки против 19 други лица и два ентитета, вклучително и иранската морална полиција, поради бруталниот третман на антивладините демонстранти по смртта во притвор на 22-годишната Махса Амини претходно годинава.
