Воените вежби од големи размери во кои ќе учествуваат американската и јужнокорејската војска ќе бидат одржани на 1 април, соопштија двете земји, пренесува „BBC“.
Заедничките вежби на Јужна Кореја и САД, соседна Северна Кореја ги гледа како провокација, односно подготовка за инвазија.
Вежбите требаше да започнат овој месец, но одложени се од дипломатски причини. Во нив учествувале 300.000 војници, односно огромни воени ресурси.
Новиот датум е одреден во време на дипломатските напори за намалување на тензиите на Корејскиот полуостров. Порано овој месец, американскиот претседател Доналд Трамп, сосема неочекувано го прифати повикот на севернокорејскиот лидер Ким Џонг Ун за разговор.
Северна Кореја е подготвена да се откаже од нуклеарното оружје, а тоа го тврдат и јужнокорејските функционери.
Од Северна Кореја за сега нема повеќе детали, но ако дојде до состанок меѓу двајцата лидери, тоа ќе биде историски момент.
Севернокорејскиот министер за надворешни работи престојуваше во Шведска, каде потенцијално би можел да се одржи евентуалниот состанок меѓу Трамп и Ким.
Вежбите на војските на САД и Јужна Кореја беа одложени бидејќи се поклопуваа со одржувањето на Зимските олимписки игри во Пјонгчанг.
САД и Јужна Кореја и понатаму тврдат дека вежбите се од одбранбена природа, односно дека Северна Кореја не треба да ги третира како провокација.
Вежбите вклучуваат симулација на почва, море и воздух, како и компјутерски симулации. Исто така, претставуваат тренинг во случај на терористички напади, како и напади со хемиско оружје.
