Шефот на американската Централна разузнавачка агенција (ЦИА) Вилијам Барнс наводно му понудил на Киев „мир во замена за земја“, а на Москва – „земја во замена за мир“.
Во јануари, шефот на американската Централна разузнавачка агенција (ЦИА) Вилијам Барнс им предложи на Москва и Киев да склучат мир, според кој 20 отсто од окупираната територија на Украина би заминале кај Русија, пишува Neue Zürcher Zeitung (NZZ), цитирајќи двајца германски политичари.
Сепак, двете страни ја одбиле таквата понуда. Во Киев ги отфрлиле сите предлози за поделба на нивната територија, а во Москва биле сигурни дека „во секој случај долгорочно ќе ја добијат војната“.
Кога станало јасно дека таквиот мировен план не им одговара на страните, американскиот претседател Џо Бајден реши да попушти пред германскиот канцелар Олаф Шолц и одобри испорака на американските тенкови Abrams во Киев. Ова ѝ овозможи на Германија да дозволи испорака на тенкови Leopard 2 во Киев.
„Оваа верзија на настаните е целосно лажна“, изјави анонимен функционер на ЦИА за Newsweek.
Заменик портпаролот на Советот за национална безбедност, Шон Дејвит, рече дека информациите на NZZ „не се вистинити“. Официјално, ниту Москва, ниту Киев не ја коментираа оваа информација.
Украина не преговара со Русија од мај 2022 година. По анексијата на регионите Херсон, Запорожје, Донецк и Луганск, што рускиот претседател Владимир Путин го објави на 30 септември 2022 година, украинскиот претседател Володимир Зеленски потпиша одлука за забрана на преговорите со Путин.
