Во пресрет на финалето од Лига Европа помеѓу Челзи и Арсенал, тренерот на лондонските „сини“, Маурицио Сари, е поврзуван со неколку италијански тимови бидејќи на Островот се шпекулира дека тој наскоро ќе биде отпуштен. На овие гласини, тој имаше интересен одговор кој можеби нема да им се допадне на навивачите на Челзи.
Италијанецот на почетокот на оваа сезона потпиша двегодишен договор со Челзи, но само 10 месеци од почетокот на договорот тој се наоѓа пред излезните врати од Стемфорд Бриџ.
Сари е поврзуван со Јувентус и Рома – два италијански клуба кои неодамна останаа без тренери, но тој тврди дека останува фокусиран на Челзи и нема намера да преговара со друг клуб освен ако не биде отпуштен. На денешната прес-конференција беа изнесени неколку претпоставки, меѓу кои и онаа дека неговиот ангажман во Лондон би можел да заврши доколку не го освои трофејот од Лига Европа.
„Ако иднината во клубот ми зависи од финалето, тогаш подобро е да бидам отпуштен уште веднаш во овој момент. Десет месеци работа и кариерата треба да ми зависи од само 90 минути? Тоа не е фер, не е правилно“, изјави Сари.
Иако на моменти изгледаше како да е на раб на отпуштање, Сари сепак имаше пристојна сезона на клупата на Челзи. Неговиот клуб заврши на третото место во Премиер лигата, загуби во финалето од Карабао купот, а сега има шанса да ја заврши сезоната со титула во финалето од Лига Европа, во кое игра против градскиот ривал Арсенал.
