Милан успеа да го држи првото место во Серија А и покрај „киксот“ од 2:2 против Парма во неделата. Тимот играше без повредениот Златан Ибрахимовиќ, кој наскоро треба да се врати и да го води клубот во борбата за Скудетото.
39-годишниот Швеѓанец, кој важи за главен мотиватор во миланскиот клуб, не ги крие своите амбиции.
„За да останам во форма, тренирам многу. Мојата филозофија е дека кога работиш напорно, сè ти се враќа. По 30-та година од животот, треба да работиш уште повеќе за да се чувствуваш добро. Враќањето во Милано беше предизвик затоа што тимот не беше на врвот. И пред мене играчи се враќале во Милано и тие не успевале да играат исто во двата мандата. Си реков - ќе бидам Златан Ибрахимовиќ и ќе ги сменам работите“, изјави Ибра во видеоразговор со Gazzetta dello Sportза време на свеченоста за прогласување на Легендата на годината.
Тој рече дека верува во титулата.
„Тимот мора да има храброст да сонува за победа, не смееме да се плашиме. Успеав да им пренесам харизма на соиграчите и мора да веруваме во себе, дури и ако сме постари. Никогаш не смееме да се предадеме“.