Објавените снимки од руски воз кој носи нуклеарна опрема кон украинското бојно поле дополнително ги поттикна стравувањата дека Владимир Путин би можел да тестира нуклеарно оружје.
Видеото е објавено на промосковскиот Telegram канал Rybar и е снимено во централна Русија. На него се гледа како возот, кој е поврзан со 12-та главна управа на Министерството за одбрана, превезува транспортери и други оклопни возила.
Воениот аналитичар Конрад Музика рече дека 12-та главна управа е одговорна за руското нуклеарно оружје, неговото складирање, одржување и издавање на единиците, пишува Sky News.
Музика смета дека оклопните возила ќе се користат исклучиво за заштита на нуклеарните единици и дека објавувањето на снимката веројатно е некакво предупредување за Западот. Имено, вознемирувачката снимка се појави кога се појави информација дека Русија ќе го тестира своето таканаречено „оружје на апокалипсата“, поточно нуклеарното торпедо Poseidon.
Торпедото е на подморницата К-329 Белгород, која плови кон Арктикот каде, според весникот La Repubblica, руската војска има намера да го тестира.
Музика рече дека транспортот на воена опрема што им припаѓа на единиците со нуклеарно оружје не мора да значи дека Русија се подготвува да распореди нуклеарно оружје во Украина.
„Можеби ова е сигнал до Западот дека ситуацијата во Украина ескалирала. Сепак, можеби станува збор за транспорт на опрема на руските стратешки ракетни сили (RVSN), кои наесен одржуваат воени вежби и обука. може да се работи за испраќање опрема за вежба за нуклеарно одвраќање „Гром“, изјави Музика, а пренесува Daily Mail.
RVSN е гранка на руските вооружени сили што ја формира основата на националната програма за нуклеарна одбрана. Се состои од десетици полкови кои контролираат илјадници нуклеарни оружја и интерконтинентални балистички ракети (ICBM).
Воените вежби „Гром“ ги обединуваат единиците на копнените, воздушните и поморските нуклеарни сили на Русија за да го тестираат својот одговор во случај на нуклеарен конфликт. Последен пат се одржаа во октомври 2019 година.