Претседателот на Каталонија, Пере Арагонес, уште еднаш проговори за можностите за организирање референдум за независност на Каталонија и на јавноста ѝ откри потенцијално прашање што би можело да се постави на референдумот.
На прес-конференцијата, Арагонес рече дека за време на предизборната кампања им ветил на граѓаните дека ќе ја спроведе идејата за организирање референдум.
Арагонес нагласи дека референдумот може да се организира во согласност со членот 92 од шпанскиот Устав.
„Гласањето за независност е можно во сегашната законодавна рамка. Тоа е само прашање на волја, исто како и амнестијата. Извештајот на комисијата сугерира неколку начини за тоа, но приоритет би бил членот 92 од шпанскиот Устав, кој предвидува консултативен референдум за политички одлуки од особено значење. Тој го свикува кралот, а сето тоа на предлог на премиерот и со овластување на Конгресот на Шпанија“, рече Арагонес.
Сепак, Арагонес нагласи дека извештајот на комисијата не предвидува минимално учество за референдумот да се смета за обврзувачки, ниту процент од гласовите „за“ или „против“ независност.
Кога станува збор за прашањето што би им се поставило на граѓаните, Арагонес рече дека тоа би било едноставно.
„Дали сакате Каталонија да биде независна држава?“, објасни Арагонес.
Објаснувајќи ја одлуката, Арагонес го спореди овој тип на гласање со она во Шкотска што се одржа во 2014 година и нагласи дека тоа би било најидеалното и најизводливо решение за Каталонија.