Товарниот брод „Фелисити Ејс“ носел 4 илјади автомобили во САД кога упатил повик за помош поради пожар.
Вкупно 22 члена на екипажот синоќа биле успешно евакуирани од 198 метри долгиот товарен брод кој откако избил пожар во внатрешноста на пловилото испратил сигнал за помош. Бродот пренесувал 4 илјади автомобили, од кои поголемиот дел од марките Porsche и Volkswagen.
Пожарот избил кога бродот се наоѓал во близина на Азорските Острови, поточно островот Фајал, кои ѝ припаѓаат на Португалија, па на помош дошла португалската морнарица од единицата на Сетубал со 4 пловила. Ним им се приклучила и португалската авијација за поуспешна евакуација.
Бродот тргнал од германскиот пристанишен град Емден кој излегува на Северното Море, а крајна дестинација му била Дејвисвил во американската сојузна држава Род Ајленд.
„Нашите мисли веднаш се упатија кон 22-члениот екипаж на трговскиот брод 'Фелисити Ејс', за кои разбравме дека се безбедни и во добро здравје како резултат на спасувачката мисија на португалската морнарица откако бил пријавен пожар на бродот“, соопшти портпаролот на Porsche.
„Информирани сме за инцидент со карго бродот кој пренесува возила од Volkswagen Group преку Атлантикот. Во моментов немаме информации за повредени. Соработуваме со локалните власти и бродската компанија за истражување на причините кои довеле до инцидентот“, стои во соопштението објавено од Volkswagen.
