По серијата неуспешни резултати на домашната сцена Баерн одлучи да ја прекине соработката со тренерот Томас Тухел на крајот од сезоната, соопштија денеска „Баварците“.
Поранешниот европски шампион со Челси пристигна на „Алианц Арената“ во март минатата сезона, но годинава не успеа да ги оправда очекувањата на навивачите и клубот. Баерн на табелата во Бундеслигата заостанува 8 бода зад лидерот Баер од Леверкузен, што според управата на „Баварците“ е недозволиво за реномиран клуб како гигантот од Минхен.
„Баерн и Тухел заеднички одлучија заемно да ја прекинат соработката на 30 јуни годинава. Според првичниот договор, соработката требаше да трае до 30 јуни 2025 година. Ова е резултат на конструктивна дискусија меѓу извршниот претседател на клубот, Јан-Кристиан Дресен и Тухел“, соопшти денеска Баерн.
Баерн моментално е на второто место во Бундеслигата, со 8 бода помалку од првопласираниот Баер Леверкузен. Клубот од Минхен неодамна беше поразен од Лацио со 1:0 во првиот осминафинален натпревар од Лигата на шампионите.
Тухел го презеде Баерн во март 2023 година, а минатата сезона со клубот од Минхен ја освои титулата во Бундеслигата.
Летоска се засили со англискиот голгетер Хари Кејн.
