Поминаа повеќе од три години откако научниците за прв пат пронајдоа микропластика во четири човечки плаценти.
Неколку години подоцна, на почетокот на 2023 година, микропластика беше пронајдена во 17 плаценти.
Сега, користејќи нова техника, експертите идентификуваа пластични честички помали од еден микрон во најголемиот примерок од плацентата досега. Тие пронајдоа микропластика во сите 62 проучувани примероци, со концентрации кои се движат од 6,5 до 685 микрограми на грам ткиво, што е многу повисоко од нивоата пронајдени во човечката крв.
Сè уште не е познато како микропластиката влијае на нашето здравје или, во овој случај, на развојот на фетусот.
„Дозата го прави отровот. Ако дозата продолжи да расте и видиме дека влијае на плацентата, тогаш микропластиката може да влијае на сите цицачи. И тоа не е добро“, вели биологот Метју Кампен од Универзитетот во Ново Мексико.
Научниците со години работеа на сигурен метод за откривање што може да ја одреди точната маса на овие честички и од каков тип на пластика доаѓаат. Само тогаш можеме правилно да го процениме влијанието на микропластиката врз здравјето.
За време на новата студија, експертите користеа метод со висока резолуција за скенирање на 62 примероци од донирана човечка плацента и забележаа ситни пластични честички во сите нив. Повеќе од 50% од пластиката била составена од полиетилен - пластика од која се направени повеќето кеси и шишиња за еднократна употреба, пишува Science Alert.
Освен полиетилен, научниците пронајдоа и поливинил хлорид (PVC), најлон и полипропилен. Тие додаваат дека честичките се веројатно стари неколку децении, односно оксидирале и издржале со текот на годините пред луѓето да ги вдишат или проголтаат.
„Засега не се познати факторите кои влијаат на таквите екстремни опсеги на концентрации на микропластика во плацентата, ниту пак знаеме дали тие негативно ќе влијаат на развојот и растот на плацентата и фетусот или на здравјето на мајката. Плацентата има релативно висок проток на крв и зема голема количина на хранливи материи од крвната мајка, што би можело да ја направи поизложена на загадување“, велат научниците.
Истражувањето Quantitation and identification of microplastics accumulation in human placental specimens using pyrolysis gas chromatography mass spectrometry беше објавено во списанието Toxicological Sciences.
