Северна Кореја истрела „неидентификувана балистичка ракета“, соопшти јужнокорејската војска, неколку дена по последниот тест и во пресрет на посетата на американскaта потпретседателка Камала Харис на Јужна Кореја, пренесе AP.
„Северна Кореја истрела неидентификувана балистичка ракета во Источно Море“, соопшти здружениот Генералштаб во Сеул, мислејќи притоа на водите што се нарекуваат и Јапонско Море.
Јапонската крајбрежна стража, исто така, ја потврди можноста за лансирање балистичка ракета, пренесувајќи информации од јапонското Министерство за одбрана и притоа ги повика бродовите на внимателност.
Лансирањето е дел од досега невидената серија воени тестови од Пјонгјанг годинава.
Јужнокорејската разузнавачка агенција предупреди дека Пјонгјанг се подготвува да изврши нова нуклеарна проба.
„Северот го заврши третиот тунел во нуклеарната централа Пунџе-ри“, изјави пратеникот Јо Санг Бум за новинарите по состанокот на разузнавачките служби во Сеул.
Американската потпретседателка Камала Харис утре треба да пристигне во Сеул во кратка посета во која ќе ја посети демилитаризираната зона меѓу двете Кореи.
Американскиот брод на нуклеарен погон УСС „Роналд Реган“ неделава учествуваше во воените вежби со јужнокорејската војска во водите во близина на полуостровот.
Вашингтон е главниот безбедносен сојузник на Сеул и околу 28.500 американски војници се стационирани во Јужна Кореја.