Северна Кореја во понеделникот истрела уште пет проектили со кус дострел во водите на Јапонското Море, соопшти јужнокорејското министерство за одбрана во контекстот на зголемените тензии на Корејскиот полуостров.
„Лансирањата се регистрирани во областа на градот Хамхунг, околу 15.39 часот по локално време, или 7.39 минути по македонско. Проектилите летале околу 200 километри и паднале во морето“, соопшти министерството за одбрана на Јужна Кореја.
Според истиот извор, јужнокорејските војски се „ставени во состојба на боева готовност и внимателно ја следат ситуацијата“. Притоа не се наведува типот на ракетите кои биле истрелани.
Ова е трето лансирање на проектили од источниот брег на Северна Кореја во последните две седмици. Во петокот, на 18-ти март, беа истрелани две балистички ракети со среден дострел, исто така, во водите на Јапонското Море. Стручњаците претпоставуваат дека станува збор за проектили од типот „Родонг“ со дострел меѓу 1.200 и 1.500 километри.
Претходно на 10-ти март Пјонгјанг објави дека лансирал две балистички ракети со кус дострел, исто така, кон Јапонското Море. Според јужнокорејската воена команда, овие проектили биле лансирани од покраината Хванхае-до, во јужниот дел на Северна Кореја и паднале во водите североисточно од пристаништето Вонсан, во источниот дел од земјата.