Фудбалерите и стручниот штаб на Шалке 04 синоќа беа нападнати со јајца од страна на гневните навивачи откако тимот и математички испадна од Бундеслигата.
Клубот од Гелзенкирхен, седумкратен шампион на Германија, петкратен освојувач на ДФБ купот и победник на УЕФА купот од 1997 година, синоќа испадна од најдобрата германска лига по пауза од 30 години.
Шалке гостуваше во Билефелд кај Арминија и загуби со минимални 1:0, но доволни за најлошото. „Рударите“ имаат очајна сезона и испаѓањето секако ќе се случеше бидејќи се заковани на дното од Бундеслигата со само 13 бодови од 30 кола, од кои само 2 победи и 7 нерешени пропратени со 21 пораз.
Откако клупскиот автубус доцна синоќа се врати во Гелзенкирхен, околу 600 навивачи го пречекаа и дел од нив со јајца и други предмети фрлаа по играчите, а полицијата спречи ескалација на ситуацијата.
Во сезоната 1990/91 Шалке како првопласиран во популарната Цвајте лига се врати во елитата на германскиот фудбал. Најголемите бундеслигашки успеси ги доживеа во сезоните 2000/02, 2004/05, 2006/07, 2009/10 и 2017/18 кога завршуваше на 2. место.
Само пет сезони во својата историја Шалке има играно во втората Бундеслига: првпат во 1981/82, а последен 1990/91. Наредната сезона ќе биде шеста. Сите останати сезони, вклучувајќи ја и тековнава, 79 на број, ги има минато во првата германска лига која од 1963 се вика Бундеслига и се игра во овој формат.
