Холивудската актерка сака да биде ѕвездата на лезбијска верзија на култниот „Die Hard“ во која жена ќе тргне во поход да си ја спаси сопругата.
Првиот од филмовите „Die Hard“ излезе во 1988 година и во него, њујоршкиот детектив Џон Меклејн (Брус Вилис) ја спасува сопругата (со која не се во најдобри односи) од терористичка закана во зградата каде што таа работи во Лос Анџелес.
Филмот за кратко време стана божикен класик и е синоним за празнично филмско уживање, но се чини дека е време за квир верзија на класикот.
Шарлиз Терон со големо задоволство би ја исполнила желбата на ЛГБТК+ заедницата.
Ѕвездата на „Atomic Blonde“ се изјасни по прашањето за лезбијска верзија на „Die Hard“ на Twitter, покажувајќи ја нејзината посветеност на заедницата што отсекогаш гласно ја поддржувала.
Идејата за лезбијска верзија на „Die Hard“ со Шарлиз Терон во главната улога првпат се појави на Twitter на 5 декември.
„Лезбијски божикни романтични комедии се океј, ама она што НАВИСТИНА сакам да го видам е Die Hard филм во кој Шарлиз Терон ќе откачи и ќе тргне во поход да си ја спаси сопругата“, напиша една твитерџика.
Терон денеска го ретвитна ова и додаде: „Кај да се пријавам?“.
Твитерџиите се изјаснија дека многу би сакале Тилда Свинтон да игра покрај Терон во ваквиот филм.
ЛГБТК+ заедницата ја обожава Терон, а актерката е гласен поддржувач на правата на квир луѓето. Таа лани соопшти дека едната од нејзините ќерки, Џексон, се идентификува како трансродово лице.
