Скопје, 26 април 2020 (МИА) – После вчерашните концерти на отворено во Топанско Поле на Артан Кастрати и групите Funk Shui и Musaiq кај Млечен, денеска ќе настапат шест изведувачи како дел од програмата „Култура во време на Корона“ што ја спроведува Град Скопје за подрршка на културните работници.
-Со почеток во 11:30 часот, на фејсбук страницата на Град Скопје ќе може да го проследите видео перформансот на Гоце Илиевски, а половина час потоа, од 12:00 часот па до 14:00 часот следат пијано изведбите на Арда Мустафаоглу, Емилија Потевска Попивода и Дуња Иванова во паркот Шопен во Кисела Вода. Во 14:00 часот ќе настапи Силви Бенд со своите познати хитови. За вечерните часови, следат маалските концери на групата Pluto’s Doubts во 18:00 часот и групата South Park во 20:00 часот во населбата Аеродром кај Стела, информираат од Град Скопје.
Сите настапи ќе бидат пренесувани во живо на
– Facebook страницата на Град Скопје https://www.facebook.com/CityofSkopje/?ref=br_rs
– Youtube каналот на Град Скопје https://www.youtube.com/channel/UChnvnL2Inms7iLk6uzQFyTw
Покрај музичките настапи, во програмата „Култура во време на Корона“ за наредниот период планирани се изложби, видеоарт презентации, настапи на диџеи и состави на класична музика, како и театарски изведби.
-Град Скопје, заедно со градските културни институции објави Јавен повик за финансирање проекти како дел од кризните мерки „Култура во време на корона“. Идејата на повикот е пред сè да се поддржат невработените уметници, односно оние уметници кои што ги загубиле своите редовни приходи во овој период, но и да се доближи културата до сечиј дом. Заинтересираните уметници може да се пријавуваат на https://mkc.mk/vesti/grsk_povik1/. Со овој повик ќе се поддржат маалски изведби во времетраење до два часа, техничката опрема ќе биде обезбедена од културните установи на Град Скопје, како и виртуелни изложби, претстави, перформанси, концерти, работилници за деца… во времетраење до два часа, велат од Град Скопје .
Сите учесници, додаат оттаму, ќе добиваат еднаков солидарен хонорар во нето износ од 14.500 денари. Повикот ќе трае до завршувањето на вонредната ситуација.