Ви „умре“ батеријата? Не правете грешка со полнењето.
На сите ни се случува да заборавиме или да немаме време да го наполниме телефонот.
Ова може да биде вистински проблем кога сме далеку од дома. За наша среќа, има се повеќе јавни места кои ќе ни ги олеснат маките и ќе ни овозможат целосно бесплатно да ја наполниме батеријата.
Сепак, иако јавните станици за полнење може да изгледаат како добредојдено решение, нивната употреба може да создаде огромни проблеми. Зошто?
„Тие станици за полнење и USB-порти може лесно да се модифицираат за да им овозможат на криминалците пристап до нашите телефони, вклучително и инсталирање малициозен софтвер на уредите“, вели Џејмс Гопел, професор по сајбербезбедност на Универзитетот Дрексел.
Ова се најопасните места за полнење на вашиот уред:
Аеродроми
Железнички / автобуски станици
Туристички атракции
Трговски центри
Хотели
Кафулиња
Овие локации имаат многу сообраќај, а криминалците ги сакаат бидејќи можат да стигнат до огромен број жртви. Сепак, неопходно е да се разликуваат четири типа на полнење телефон на јавни места и нивното ниво на безбедност.
Најбезбедниот начин на полнење е штекерот каде што ќе го приклучите полначот на телефонот (ако го носите со себе). На овој начин, хакерите не можат да пристапат до вашиот уред, па дури и ако штекерот е оштетен, нашите полначи за телефон одамна се паметни, па мала е веројатноста дека батеријата на телефонот може да се оштети.
Вториот најбезбеден начин на полнење е безжичното полнење. Размената на податоци помеѓу телефонот и безжичниот полнач е едноставно „ракување“, каде што уредот му кажува на полначот дека може да почне да се полни. Секако, неопходно е вашиот паметен телефон да има можност за безжично полнење.
Преостанатите два типа на полнење што можете да ги најдете на јавни места се USB-порта во која ќе го приклучите вашиот кабел или постоечки USB-кабел што ќе го приклучите во телефонот.
Експертите за сајбер безбедност нè предупредуваат токму за овие типови на полнење. Портите и каблите се честа мета на криминалците, а преку нив стигнуваат до своите жртви. Општата препорака е да ги избегнувате, но доколку морате да ги користите, не ги користете на наведените места.
