Германскиот канцелар Олаф Шолц, во денешното обраќање пред Бундестагот, рече дека ѝ гарантирал на Украина понатамошна воена помош, како од Германија, така и од европските земји.
„Германија, заедно со нејзините европски партнери, ќе се погрижи Украина да продолжи да се снабдува со оружје и опрема за да истрае во својата одбрана“, рече германскиот канцелар Олаф Шолц (Социјалдемократска партија на Германија SPD) при поднесувањето на извештајот за работата на коалициската влада до Бундестагот, во пресрет на самитот на Советот на Европската Унија следната недела во Брисел.
Тој рече дека сега е многу важно Украина да се снабди со муниција што е можно побрзо. „На состанокот на Советот на Европската Унија следната недела ќе донесеме мерки со нашите европски партнери за да постигнеме подобро и пред сè континуирано снабдување“, рече Шолц.
Канцеларот истакна дека Германија веќе обезбедува значителна воена помош за Украина, која се брани од руските напади. Шолц ги повика граѓаните на Германија да гледаат кон иднината со доверба и покрај драстичните промени што се случија по рускиот напад на Украина.
„Точно е дека самодовербата и оптимизмот не може да се наметнат со декрет, но тие се плод на реализираните напори“, рече Шолц и укажа на фактот дека Германија во меѓувреме стана независна од рускиот гас и нафта, за само осум месеци.
„Немаше ниту економски пад, ниту затворање на индустриските постројки, како што некои предвидуваа“, рече Шолц. „Ова покажува дека, кога е потребно, можеме многу брзо да ја извршиме трансформацијата“, заклучи канцеларот Шолц.
Шолц, исто така, вети дека градовите и општините ќе помогнат во згрижувањето на бегалците од Украина. Парламентарната опозиција ја критикуваше социјалдемократско-зелено-либералната влада на Олаф Шолц за неуспеси во нејзината претходна работа и реакција на војната во Украина.
„Самодовербата се јавува кога граѓаните чувствуваат дека ги води влада која има ориентација, носи одлуки, која не е само силна на зборови“, рече претседателот на опозициската Христијанско-демократска унија (CDU) Фридрих Мерц, реагирајќи на говорот на Шолц.