Завршницата на шпанскиот Суперкуп ќе се игра во Ријад од 10 до 14 јануари 2024 година, а ќе настапат Барселона, Реал Мадрид, Атлетико и Осасуна.
Четврти пат Суперкопа де Еспања ќе се игра во Саудиска Арабија, по изданието во 2020 година во Џеда и изданијата од 2022 и 2023 година исто така во Ријад.
Преселбата на шпанскиот Суперкуп во Саудиска Арабија е дел од договорот потпишан со таа земја, кој на РФЕФ ѝ плаќа околу 30 милиони евра по сезона. Шпанскиот Суперкуп, според договорот, во Саудиска Арабија ќе се игра до 2029 година.
Во полуфиналето ќе се сретнат ривалите од Мадрид, Реал (победник на Копа дел Реј) и Атлетико (трет во Ла Лига), како и Барселона (шампион на Шпанија и бранител на титулата) и Осасуна (финалист на Копа дел Реј).
Полуфиналните натпревари се закажани за 10 и 11 јануари, додека финалето е закажано за 14 јануари. Сите ќе се играат на стадионот „Ал-Ауал Парк“, дом на Ал Наср.