Слоновите во заточеништво во Шри Ланка ќе добијат биометриска лична карта, а на нивните јавачи им е забрането да пијат додека јаваат, стои во новиот закон за заштита на животни во таа земја.
Многу богати жители на Шри Ланка поседуваат слонови како домашни миленици за да го покажат нивниот престиж. Но, често има и пријави за лош третман кон тие животни.
Воведени се строги регулации за работа со слонови, како и обврска на дневно капење во траење од два и пол часа. Официјалните податоци покажуваат дека на Шри Ланка има околу 200 слонови во заробеништво, додека на слобода има околу 7.500.
Новиот закон предвидува сите сопственици на слонови да имаат нивни лични карти, се забранува работата со слонови бебиња и нивно одвојување од мајките. Слоновите вработени во дрвната индустрија не смеат да работат подолго од 4 часа, а се забранува и ноќна работа.
Слоновите веќе не смеат да се користат во филмови освен во владини продукции и под строг надзор на ветеринар. Во туризмот се забранува јавање слонови на повеќе од 4 лица, а оние кои ги јаваат не смеат да пијат алкохол.
Сопствениците на слонови мора да ги испраќаат животните секои шест месеци на преглед, секој што ќе го прекрши законот може да остане без слон. а му се заканува и казна затвор од 3 години.
Ловењето диви слонови на Шри Ланка е казниво со смрт, но обвинувањата се многу ретки.