Скржавите прволигаши нека се топат на горештините, штипска Брегалница иако второлигаш своите домашни натпревари ќе ги игра под ноќно небо, а првиот е токму в сабота кога гостуваат кочанчани.
Под топлото македонско сонце не може да се стои мирно десетина минути, а камо ли да се игра 90 минути фудбал. И покрај тоа што некои прволигаши имаат рефлектори на стадионите, никој не сака да плати за осветлување па ги мачат играчите да играат на 30 и кусур степени во најголемите горештини.
Тоа не е случај со штипските сини. Екипата на Брегалница своите домашни натпревари ќе ги игра во вечерен термин, под рефлектори. Нормални услови не само за играчите да можат да го прикажат најдоброто од себе, туку и за публиката да не се топи на трибините.
Веќе в сабота во градот на пастрмајлиите гостува повратникот Осогово. Натпреварот е закажан за 19 часот, а картите се веќе во продажба и тоа по багателна цена од само 100 денари. Се очекуваат и гостински навивачи од Кочани за уште поубава атмосфера.
Брегалница во првото коло минатиов викенд славеше на гости кај плачковица со 4:2, додека Осогово доживеа непријатно изненадување пред своја публика губејќи 3:1 од крушевски Питу Гули.
