Уништувањето на нуклеарниот погон во Северна Кореја би требало да почне денеска и да трае до петок. Но, тоа ќе зависи од временските услови.
Северна Кореја во последен момент им дозволи на јужнокорејските новинари да им се приклучат на малата група на одбрани странски новинари кои ќе присуствуваат на уништувањето на полигонот за нуклеарни проби, соопшти денеска јужнокорејската влада.
Северна Кореја минатиот месец најави дека ќе го демонтира полигонот Пунгје-ри на североисток во земјата, што наиде на воодушевување од страна на Вашингтон и Сеул, воочи предвидениот самит Северна Кореја-САД.
На тој полигон Пјонгјанг изврши шест нуклеарни проби.
Последната и најсилна се случи во септември минатата година, кога се изврши проба на хидрогенска бомба. Уништувањето на полигонот треба да започне денеска и да трае до петок, зависно од времето, соопштија од Пјонгјанг.
Мал број на странски новинари, вклучувајќи и јужнокорејски, се повикани се известуваат за тоа.
Новинари од Кина, Русија, Велика Британија и САД вчера отпатуваа од Пекинг со авион, а потоа со воз и автобус ќе стигнат до полигонот.
Јужнокорејскиот министер за обединување денеска објави дека Пјонгјанг дополнително одобрил да дојдат и осум јужнокорејски новинари.
Инаку, споменатиот самит Северна Кореја-САД се очекува во јуни, а би можел да понуди историска шанса за мир на Корејскиот полуостров.
