Доаѓањето на новата структура на луѓе со новите сопственици во Челси не помина без скандал откако Роман Абрамович го напушти лондонскиот клуб.
Демијан Вилоби е отпуштен од Челси нешто повеќе од две недели откако беше назначен за комерцијален директор, потврди лондонскиот клуб.
Тој беше отпуштен по обвиненијата и доказите за сексуално вознемирување против потенцијалната инвеститорка Каталина Ким.
„Фудбалскиот клуб Челси потврдува дека го прекина работниот однос на комерцијалниот директор Демијан Вилоби. Доказите за несоодветни пораки испратени од г-дин Вилоби пред неговото назначување во Челси на почетокот на овој месец неодамна беа доставени до клубот и беа истражени од клубот. Иако пораките биле испратени пред неговото вработување во клубот, таквото однесување е во апсолутна спротивност со работната средина и корпоративната култура воспоставена од новата сопственичка гарнитура на клубот“, се вели во соопштението на лондонскиот гигант.
Тие исто така истакнаа дека сопствениците на клубот неуморно работат на поставување и постигнување на највисоките стандарди на теренот и надвор од него.
„Тие се решени да воспостават и негуваат култура на транспарентност, отчетност, инклузивност, различност и можности. Клубот е посветен на создавање средина што ги отелотворува овие вредности“, велат од Челси.