Унгарија и Словенија ја договорија мапата за постепено реотворање на нивните граници до 1 јуни, најави денеска унгарскиот министер за надворешни работи Петер Сијарто.
„Рестартирањето на нашите стопанства не е возможно без рестартирање на меѓународната соработка“, напиша Сијарто на својата официјална Facebook страница.
Унгарија денеска почна со укинување на рестриктивните мерки воведени за спречување на ширењето на новиот коронавирус. Граѓаните мора да носат заштитна маска кога пазаруваат и се возат во јавен превоз.
До денеска, Унгарија има пријавено 3.535 случаи на заболени од COVID-19, 462 смртни случаи и 1.400 оздравени пациенти. Словенија регистрираше 1.466 случаи, од кои 104 починаа.
Во петокот, илјадници велосипедисти се собраа во центарот на Љубљана и протестираа против Владата на Словенија, ден откако властите прогласија „крај на епидемијата“ во земјата. Собраните граѓани тврдеа дека Владата ги крши граѓанските права со тој чекор.