Со изложба на околу 300 маски, изработени од вештите раце на учениците од прилепските училишта, а претставени во прилепскиот Центар за култура „Марко Цепенков“ почнаа карневалските свечености во Прилеп. Главното карневалско дефиле на маските е в недела на Прочка кога се очекуваат околу 500 учесници од Прилеп и другите градови.
Како што објаснува Снежана Ристеска, советник за култура во прилепската локална самоуправа, на големо задоволство, карневалот Прочка се враќа по двегодишна пауза.
– Изложбата на околу 300 маски кои ги изработија учениците од прилепските основни и средни училишта е традиционалната најава на карневалските свечености. Избрани се најдобрите и се доделени награди на најумешните млади кои ги направија маските од природни материјали, што е традиција на карневалот. В недела напладне е карневалското дефиле на маскираните во центарот на Прилеп. Очекуваме учесници и од другите градови. поради ковид-мерките, не е можно да присуствуваат гости од странство. Но, на прилепчани многу им е битно што се врати карневалот, вели Ристеска.
Димитар Талески, ученик од ОУ „Кирил и Методиј“ од прилепското село Подмол ја освои наградата за најдобра маска. Тој вели дека речиси еден месец работел на маската.
– Среќен сум што освоив награда. Речиси еден месец ја работев маската, од природни материјали. Користев тажна врба, ја обликував, сплетов и кошница, стилизирано, богато украсена, појаснува ученикот Димитар Талески.
Ванчо Георгиев, претседател на здружението „Прилепски мечкари“ коорганизатори на карневалот, вели дека мечкарите, заштитната маска на Карневалот, се подготвени, сошија и нови маски.
– Мечкарите се подготвени за карневалот. Тие напорно работеа за да ги обликуваат и да ги обноват маските, имаат и нови кожи, прилепски фирми ни даруваа и ѕвонци-клопотарци, неизбежни за маската. Прилеп е карневалски град, ќе има и голем број прилепчани „преправени“ и се негува вековната традиција. Се радуваме што продолжува карневалот, иако без странски гости, поради пандемијата, но имаме гости од повеќе градови од земјава, вели Георгиев.
В недела напладне во центарот на Прилеп е карневалското дефиле на маските, ќе има забавувачи, жонглери, како и настап на групата „Фолтин“.
