Милијардерот и филантроп Џорџ Сорос на Форумот во Давос предупреди дека руската инвазија на Украина можеби го означи почетокот на третата светска војна, па порача дека Владимир Путин мора што побрзо да биде поразен ако светот сака да ја сочува цивилизацијата.
Според неговото мислење, дури и ако војната престане, ситуацијата во светот никогаш нема да биде како што била.
„Има многу проблеми кои го загрижуваат човештвото како борбата против пандемијата и климатските промени, избегнување нуклеарна војна, одржување глобални институции, а сето тоа е ставено наназад поради војната во Украина. Затоа велам дека цивилизацијата можеби нема да преживее“, предвидува Сорос.
Познат е по тоа што финансиски помага за создавање отворени општества и демократија со владите кои се одговорни. Предупреди дека по 11 септември ситуацијата почнала да се врти против отворените општества, а репресивните режими се во подем.
Смета дека Кина и Русија се најголемата опасност по отворените општества.