Светскиот шампион Аргентина денеска игра пријателски натпревар против Австралија, а Лионел Меси нè „почести“ сите со спектакуларен гол на самото отворање на натпреварот.
Започна репрезентативниот собир, а за оние селекции кои не играат квалификациски натпревари следуваат пријателски натпревари. Еден од најинтересните денеска е оној меѓу светскиот шампион Аргентина и Австралија на Workers Stadium во Пекинг.
Натпреварот имаше најдобра можна увертира. Лионел Меси постигна фантастичен гол на самото отворање.
Тој ја прими топката на дваесетина метри од голот, а потоа со филигрански прецизен удар го матираше голманот на Австралија, Мет Рајан. До полувремето, резултатот остана непроменет.
Ова е седми последователен гол на Меси за репрезентацијата, што покажува дека и на 36-годишна возраст сè уште игра во одлична форма и дека неговото влијание врз играта на Гаучосите е неизмерно.
Инаку, во рамките на овој репрезентативен собир Гаучосите немаат натпреварувачки средби, а на 19 јуни ќе одиграат уште еден пријателски натпревар, против Индонезија.