Откако рускиот претседател Владимир Путин се сретна со францускиот претседател Емануел Макрон, на маса долга 6 метри, истата стана инспирација за мемиња на Twitter, откако беа објавени фотографии од средбата.
Ренато Полоња, столарот кој ја направи масата, изјави дека шегите на сметка на масата, што ја направил пред 35 години за Борис Елцин, искрено го насмеале. Тој се надева дека масата ќе донесе среќа во преговорите меѓу Западот и Москва, во врска со украинската криза.
„Ја препознав веднаш штом ја видов. Многу сум горд на неа. Секогаш станувам емотивен кога мое дело е дел од нешто исклучително важно. Шегите за масата беа урнебесни. Очигледно оставила впечаток. Видов дека некој од неа направил клацкалка, што е навистина смешно. Некој ставил шипка за танцување и ја претворил во стриптиз клуб. Мислам дека може да се каже дека е инспирација за креативност“, вели Полоња.
Масата ја правел додека во периодот од 1995 година до 1997 година работел на проект за една од четирите палати на Кремљ. Мерките за безбедност биле многу строги.
„Во палатата влегувавме со пропусници. Ги скенираа парчињата дрво и не ми беше дозволено нешто да фотографирам“, вели Полоња, шеф на столарската компанија Oak, на северот на Италија.
Во разговор за Il Corriere della Sera, тој изјави дека плочата е направена од еден дел и била доста тешка за изработка.
Денес, таква маса би чинела околу 100.000 евра.