Легендарниот шведски фудбалер со босанско потекло Златан Ибрахимовиќ, кој пред неколку недели ја заврши кариерата, го предизвика најдобриот тенисер на планетата, Србинот Новак Ѓоковиќ, да се обиде со падел - спорт кој го освојува светот.
Ибра во последно време се релаксира со падел, кој стана хит спорт во светот, а сè повеќе луѓе се одлучуваат да ја играат оваа игра со рекети.
Падел обично се игра во парови на затворен терен кој е приближно 25 проценти помал од тениско игралиште. Бодувањето е исто како во нормалниот тенис, а топчињата што се користат се слични, но со малку помал притисок.
„Ноле, кога ќе бидеш подготвен“, порача Ибра кој експресно доби одговор од најдобриот тенисер на сите времиња.
„Непобедливи сме на иста страна од мрежата. Во ред е брате, подготвен сум“, одговори Ѓоковиќ.
Да потсетиме, Ибрахимовиќ меѓу првите му честиташе на Ѓоковиќ за освојувањето на Ролан Гарос и рекордната 23. Грен слем титула во кариерата, а двајцата долго време имаат одлично пријателство.