Македонскиот кошаркарски шампион МЗТ попладнево го претрпе вториот пораз во регионалната АБА2 лига. Поуспешни од „Штрковите“ беа кошаркарите на Сутјеска кои славеа победа од 56:55.
Неуспешно деби во тимот на МЗТ имаше Војдан Стојановски кој за 25 минути поминати на теренот не се запиша во листата на стрелците. Другиот нов играч, Морис Кари, реализираше 5 поени за 17 минути игра.
Најефикасни во таборот на „Аеродромци“ беа Немања Милошевиќ со 15 и Адем Мекиќ со 11 поени. Мекиќ во самиот финиш промаши две слободни фрлања, а во следниот напад црногорскиот тим постигна два поена за конечна победа.
По осум одиграни натпревари МЗТ е втор на табелата со биланс 6-2 (победи-порази), додека Сутјеска е на 4. место со пет победи и три порази.