Високите нивоа на Т-клетки, кои се развиваат по изложување на вирус кој предизвикува обична настинка, може да обезбеди заштита од COVID-19, се вели во студијата на Империјал колеџ во Лондон објавена денеска, која може да отвори нови патишта за вакцини од втората генерација.
Имунитетот против COVID-19 е комплексен и се верува дека иако постојат докази за намалување на нивото на антитела шест месеци по вакцинацијата, Т-клетките исто така играат витална улога во обезбедувањето заштита од вирусот.
Студијата, која започна во септември 2020 година, ги испитуваше нивоата на Т-клетките што произлегуваат од претходна обична настинка кај 52 контакти во домаќинството со позитивни случаи на COVID-19 кратко време откако субјектите беа изложени на вирусот за да се види дали развиле инфекција.
Откриено е дека 26 луѓе, кои не ја развиле инфекцијата, имале значително повисоки нивоа на овие Т-клетки во споредба со луѓето кои се заразиле.
Империјал не кажа колку долго ќе трае оваа заштита обезбедена од Т-клетките.
„Откривме дека високите нивоа на веќе постоечки Т-клетки, кои телото ги произведува кога е заразено со други човечки коронавируси, како што е обичната настинка, може да заштити од инфекција со COVID-19“, рече авторот на студијата д-р Рија Кунду.
Авторите на студијата, објавена во Nature Communications, рекоа дека внатрешните протеини на вирусот SARS-CoV-2 што ги таргетираат Т-клетките би можеле да понудат алтернативен пат за производителите на вакцини.
Актуелните вакцини против коронавирусот кој предизвикува COVID-19 се насочени кон шилестиот протеин, кој редовно мутира, создавајќи варијанти како што е омикрон, кои ја намалуваат ефикасноста на вакцината против симптоматска инфекција.
„Спротивно на тоа, внатрешните протеини насочени од заштитните Т-клетки што ги идентификувавме мутираат многу помалку“, вели професорот Аџит Лалвани, коавтор на студијата.
„Следствено, тие се разликуваат многу помалку од една варијанта на вирусот SARS-CoV-2, вклучително и омикрон. Според тоа, новите вакцини што ги таргетираат овие внатрешни протеини ќе развијат сеопфатни заштитни одговори на Т-клетките што треба да заштитат од сегашните и идните варијанти на SARS-CoV-2.“