Гувернерот на Тексас, Грег Ебот, вчера го објави најширокото укинување на мерките за коронавирус во сите сојузни држави во САД, велејќи дека повеќето компании може да се отворат со полн капацитет следната недела. Укината е и обврската за носење маски.
Извршната наредба уследи откако многу сојузни држави и поголеми градови во САД, кои бележат голем пад на бројките на заболени и хоспитализации од COVID-19, почнаа со ублажување на ограничувањата наметнати пред една година.
„Време е Тексас да се отвори 100%“, рече на прес-конференција републиканецот Ебот, кому ова му е прв гувернерски мандат. Тој додаде дека наредбата ќе стапи на сила на 10 март.
Извршната наредба на Ебот ја укинува обврската за носење маски низ целата земја и забранува казнување на жителите кои не ги носат маските. Исто така се отстрануваат сите ограничувања за деловно работење во области без голем број хоспитализации.
Во областите каде што уште има многу хоспитализирани со COVID-19, локалните власти можат да применат некои ограничувања на фирмите, но не може да одредат да се работи со помалку од 50 проценти од капацитетите, рече Ебот.
Гувернерот рече дека успеал да ги укине ограничувањата затоа што жителите на Тексас, третата најнаселена американска држава со 29 милиони луѓе, примиле скоро 5,7 милиони вакцини.
На прашањето за потегот на Тексас, портпаролот на Белата куќа Џен Псаки рече дека претседателот Џо Бајден јасно стави до знаење дека сѐ уште се потребни ограничувања против коронавирусот.
Во текот на пандемијата во Тексас се одржуваа протести против рестриктивните мерки, а најголем дел од демонстрантите не носеа заштитни маски и не ја почитуваа мерката за задолжителна социјална дистанца.
