Менаџерот на Манчестер Јунајтед, Ерик тен Хаг, вели дека ситуацијата околу иднината на Кристијано Роналдо во овој клуб не е променета и дека сѐ уште смета на Португалецот, што беше случај и претходно.
Фудбалерите на „Црвените ѓаволи“ подготовките за следната сезона ги продолжуваат во Австралија, односно на турнеја во Мелбурн, а Роналдо од „приватни причини“ не отпатува со нив и остана во Португалија каде тренираше во репрезентативниот тренинг камп.
Медиумите во Англија со денови се занимаваат со темата Роналдо за неговото евентуално заминување од Манчестер Јунајтед, а менаџерот на клубот Тен Хаг уште еднаш го потврди својот став и изјави дека ништо не е сменето.
„Веќе имавме изјави во врска со Роналдо и ништо не се промени“, рече холандскиот стратег.
Тој понатаму рече дека сегашниот тим на Манчестер Јунајтед има голем потенцијал.
„Мислам дека Манчестер Јунајтед има голем потенцијал и навистина добри фудбалери. Имаме искусни играчи, има и некои млади кои имаат потенцијал. Сега тие треба да се покажат, пред нас е тешка работа. Јунајтед е познат по добрите млади играчи, Рашфорд е еден од нив, нели? Тој е симбол на академијата на Манчестер Јунајтед, а после него ќе има уште многу таленти“, изјави Тен Хаг.
Манчестер Јунајтед минатата сезона освои 58 бодови, што е најмалку од основањето на Премиер лигата во 1992 година, а тоа што ќе игра во Лига Европа, а не во Лигата на шампионите, е главната причина поради која Роналдо сака да го напушти клубот.
Дополнително, се пишуваше дека не е задоволен и од играчкиот кадар на Манчестер Јунајтед, како и од тоа што поради неиграњето во европската елита автоматски платите на сите играчи се намалени.