Фудбалерите на Валенсија и на Реал синоќа ги поделија бодовите на натпреварот од 17. коло во Ла Лига, откако одиграа 1:1.
„Кралскиот клуб“ со вчерашното реми ја прекина низата од четири последователни победи.
Реал играше далеку подобро во првото полувреме. Имаше подобар посед на топка и доста шанси, но голманот на домаќините беше на висина на задачата.
И во продолжението на средбата Реал доминираше, но и Валенсија се разбуди. Токму во еден таков напад домаќините поведоа, а стрелец на голот беше Карлос Солер во 78. минута.
Реал до крајот на мечот се обидуваше да дојде до изедначување, но немаше решенија за одличната одбрана на Валенсија сѐ до судиското надополнување.
По една „гужва пред голот“ Бензема во 95-тата минута ја затресе мрежата на домаќините и му донесе бод на Реал. Голема помош имаше од голманот Тибо Куртоа кој во последниот напад дојде во противничкиот шеснаесеттерец за да им помогне на соиграчите.
Со освоениот бод, Реал Мадрид се изедначи со лидерот во Ла Лига, Барселона, пред меѓусебниот дуел и дербито на полусезоната закажано за в среда на теренот на Каталонците.
