Порталот Live Science објави интересна листа на најдолговечни животни во светот.
За разлика од луѓето, за кои научниците тврдат дека можат да живеат меѓу 120 и 150 години, некои животни живеат стотици години, па дури и илјадници.
Најголемите рекордери се наоѓаат во светските океани и други водни тела. Во продолжение ви претставуваме пет животни кои се на самиот врв на листата.
Исландската школка, или Arctica Islandica, живее на северот на Атлантскиот Океан, а научниците тврдат дека може да живее подолго од 500 години. Најстарата исландска школка пронајдена е школката Минг, стара 507 години и го добила името по кинеската династија Минг бидејќи се родила за време на таа династија.
Иако на почетокот изгледаат како подводни карпи или растенија, коралите се всушност колонии на безрбетниците полипи. Овие полипи може да се репродуцираат сексуално или асексуално. Најдолговечни се длабокоморските црни корали, кои живеат во тропските мориња. Најстарите примероци на црн корал се пронајдени на Хаваи, а се датирани на 4.265 години.
Слично на коралите, сунѓерите се исто така колонии на животни. Најдолговечните сунѓери се стаклестите сунѓери, кои живеат во длабоките океани. Еден од најстарите примероци припаѓал на видот Morohaphis chuni и бил стар околу 11 илјади години.
Бесмртната медуза или Turritopsis dohrnii, која живее во Средоземното Море, може да живее вечно. Овој тип на медуза е познат по тоа што може да се претвори во полип кога е неухранета или кога се чувствува загрозена, а потоа повторно да се претвори во медуза. Иако бесмртните медузи не можат да умрат од старост, нивната големина од 4,5 милиметри не им дозволува да живеат долго бидејќи често ги јадат рибите и другите организми.
Хидрите се мали животни од родот светулки, кои исто така се сметаат за бесмртни. Хидрите имаат способност да се регенерираат, што значи дека нивните матични клетки постојано се делат за да ги заменат оштетените клетки. Иако не стареат, хидрите сепак се мета на разни предатори и болести, но под поволни услови би можеле да живеат вечно.
