Претседателите на САД и Турција, Доналд Трамп и Реџеп Тајип Ердоган, разговараа денеска во Париз како да се реши случајот со убиството на саудискиот новинар Џамал Кашоги, соопшти претставник на Белата куќа.
Двајцата претседатели, заедно со 70-тина други лидери на земји, учествуваа во централната прослава по повод стогодишнината од крајот на Првата светска војна, што се одржа во Париз.
Ердоган потврди дека аудиоснимките за убиството биле предадени на американските, германските, француските и британските власти и тврди дека операцијата била нарачана од „највисоките ешалони“ во владата на Саудиска Арабија.
Трамп рекол дека очекува до следната недела да се знаат многу повеќе детали за убиството на новинарот, додавајќи дека се работи заедно со Конгресот, Турција и Саудиска Арабија за да се установи кој е одговорен за убиството на Кашоги.
Саудискиот новинар и отворен критичар на саудискиот принц Мохамед бин Салман, беше убиен во саудискиот конзулат во Истанбул минатиот месец, но неговото тело уште не е најдено.