Вашингтон, 21 август 2019 (МИА) – Американскиот претседател Доналд Трамп соопшти дека ја откажува средбата со данската премиерка Мете Фредериксен, откако скандинавската лидерка јасно порача дека нема да разговара за продажба на Гренланд на САД.
„Премиерката успеа да заштеди многу трошоци и напори како за САД, така и за Данска, со тоа што беше толку директна“, напиша вчеравечер Трамп на Twitter. „Благодарам за тоа и со нетрпение очекувам некогаш во иднина да се видиме!“
Трамп беше поканет од кралицата Маргрет II да ја посети Данска, како дел од неговата поголема турнеја низ Европа, но портпаролот на Белата куќа за Политико изјави дека Трамп не планира да ја посети земјата, како што беше предвидено.
Трамп во соопштение за време на викендот потврди дека е заинтересиран за купување на Гренланд, но изјави дека тоа не е приоритет за неговата администрација.
Wall Street Journal уште во петокот првично соопшти за интересот на Трамп за ваков исход, што доведе до реакции во Вашингтон и гнев во Данска и Гренланд.
Фредериксен изјави дека е тоа „апсурдно“ и дека премиерката на Гренланд Ким Килсен јасно кажа дека Гренланд не е на продажба.
