На сите им здодеа короната. Алармите повторно се вклучија поради новиот сој, но за крајот на годината, вестите се сепак добри: се чини дека омикрон е поблаг, бустер дозата на вакцините делува, а тука е и првата таблета за корона.
Според една студија од Англија, новиот сој на вирусот познат како омикрон има 20 до 25% помали шанси да доведе до болничко лекување отколку делта мутацијата. Лабораториските истражувања покажуваат дека омикрон има помала способност да ги инфицира белодробните клетки.
Иако останува да се види дали наодите ќе се потврдат во пракса, се чини дека омикрон ќе биде поблаг. Но, ќе се шири побрзо бидејќи поради бројните мутации на спајк-протеинот често го заобиколува имунолошкиот одговор што го стекнавме со првичната вакцинација или со заразување со првите варијанти на вирусот.
Шкотско истражување покажува дека ризикот од одење во болница со омикрон е дури две третини помал и дека овој сој практично не предизвикува потешки симптоми кај лицата под 60-годишна возраст. Тоа истражување исто така покажа дека бустер вакцината, односно третата доза, во голема мера штити од симптоми.
Во прилог на тоа зборува и истражувањето од австралискиот регион Нов Јужен Велс. Сепак, речиси сите се вакцинирани таму, а оние кои се заразени со омикрон завршуваат во болница двојно помалку отколку оние со делта.
Сепак, научниците предупредуваат дека опасноста лежи во фактот што омикрон е многу позаразен. Дури и протокот на болеста да биде поблаг, ако за краток временски период се заразат огромен број луѓе, ќе биде доволно за преоптоварување на болничките капацитети.
Некои веќе предвидуваат дека омикрон полека но сигурно става крај на пандемијата. Затоа што, овој сој е попаметен и еволутивно супериорен во однос на делтата. Тоа значи дека се шири побрзо, но поретко ги убива домаќините. Омикрон наскоро би требало да го преземе приматот од делтата.
Иако вирусот нема брзо да се искорени - можеби никогаш и нема - постојат сите шанси тој да стане ендемичен. Тоа би значело дека нема пандемија, туку дека овде-онде локално или сезонски ќе се појавува ослабена верзија на вирусот, исто како грипот во зима. Од него би се штителе како и од грип - со годишна вакцинација.
Добрата вест е што производителите на вакцини тврдат, а тоа го покажуваат првите студии, дека бустер дозата добро штити од омикрон. Тоа го вели Novavax, чија вакцина неодамна беше одобрена во ЕУ. Големи надежи се полагаат во оваа протеинска вакцина бидејќи има многу луѓе кои се скептични за новата технологија mRNA, па затоа ги избегнуваа вакцините на Moderna и на Pfizer/BioNTech.
Производителите на тие две вакцини најавија и дека третата доза одлично делува против новиот сој. Истото го најавија и производителите на AstraZeneca.
Pfizer деновиве има уште една голема вест - Американската агенција за лекови издаде итно одобрување на нивната таблета против ковид наречена Paxlovid. Една интеранализа на Pfizer покажува дека лекот ја намалува стапката на смртност за 89%.
Paxlovid всушност ја успорува репликацијата на вирусот. Секој што е болен го пие апчето дома два пати дневно, вкупно пет дена, во комбинација со друг препарат. Целта на овој лек е да се избегне сериозен тек на болеста и да се спречи можното одење во болница.
Во тек е постапката за одобрување пред Европската агенција за лекови. Тие велат дека таблетите би можеле да се препишуваат на возрасни пациенти на кои не им е потребен дополнителен кислород, а имаат зголемен ризик од тешка болест.
Производството сè уште нема да биде масовно, така што овој лек моментално е скап. Така, американските власти нарачаа 10 милиони пакети за околу 5 милијарди долари. Првите 265.000 ќе бидат испорачани во јануари, пренесува Deutsche Welle.