Јаболката се многу популарно овошје и често се користат за разни јадења и колачи, а иако остануваат свежи подолго од многу другите овошја, сепак треба да се чуваат и на посебен начин.
Повеќето луѓе чуваат јаболка во сад со друго овошје, но излегува дека тоа не е баш најдоброто место за нив, особено ако не планирате да ги изедете сите во рок од неколку дена. За да ги одржувате јаболките свежи, најдобро е да ги чувате во влажна и ладна средина.
Фиоката во фрижидерот е идеална, а јаболката таму ќе траат околу две до три недели. Доколку немате место во фиоката, можете слободно да ги завиткате и да ги чувате во подрум или гаража. Овошјето созрева 6 до 10 пати побрзо ако е на собна температура, а идеалната температура за чување на јаболката е помеѓу 0 и 3 степени Целзиусови.
Експертите тврдат дека јаболката се едни од најчестите производители на етилен, кој со текот на времето ги омекнува и им ја дава таа мека и кашеста текстура, а тоа може да им наштети на другите овошја кои стојат до нив. Поради оваа причина, чувањето јаболка на ладно место наместо на кујнскиот пулт може да ги забави емисиите на етилен.
Што се однесува до кафената боја на јаболкото кога се сече, нема начин целосно да се запре, бидејќи е предизвикана од кислородот во воздухот. Но, постојат неколку домашни трикови за да го забавите тој процес - на пример, додавајќи малку лимон, оцет или дури и вода.
За најдобра техника на зачувување, експертите препорачуваат замрзнување. Обложете тавче за печење со хартија за печење, а потоа ставете ги парчињата јаболка така што нема да се допираат. Замрзнувачот мора да биде поставен на најниска температура бидејќи овошјето побрзо ќе замрзне и ќе задржи повеќе од својата хранлива вредност. Замрзнете ги неколку часа, или додека целосно не се замрзнат, потоа извадете ги од хартијата и ставете ги во контејнер или кеса за замрзнување па вратете ги во замрзнувачот.
