Гостински победи во првите четвртфинални натпревари од второто по ранг европско клупско натпреварување забележаа Рома, Манчестер Јунајтед и Виљареал, додека Спарта со гол длабоко во надополнување избегна пораз кај Арсенал.
Загрепски Динамо на македонските репрезенттаивци Аријан Адеми и Стефан Ристовски синоќа забележа пораз дома од шпански Виљареал и тоа со гол од белата точка. Во 43. минута Кевин Теофил-Катрин играше со рака, а по интервенција на ВАР судијата досуди пенал за „Жолтата подморница“ кој успешно го реализираше Жерард Морено.
Динамо не успеа да израмни и на реваншот патува со достижна негатива. Двајцата наши фудбналери го одиграа целиот натпревар.
Ајакс водеше против Рома од 39. минута со голот на Дави Класен, а во 53. минута Душан Тадиќ прокоцка шанса за 2:0 откако неговиот пенал го одбрани голманот Пау Лопес. Казната стигна само четири минути подоцна кога Лоренцо Пелегрини израмни, а на три минути пред крајот Ибањес се погрижи „Римската волчица“ да си замине со предност од 2:1.
Манчестер Јунајтед ја потврди фаворитската улога на гостувањето во Гранада и со 2:0 оствари одлична предност. Стрелци на головите беа Маркус Рашфорд во 31. минута и Бруну Фернандеш во 90-тата во негов препознатлив стил - од белата точка.
Арсенал им приреди ново разочарување на своите навивачи откако се мачеше со прашка Славија. „Топчиите“ конечно го скршија чешкиот отпор на четири минути пред крајот, но кога сите помислија дека Арсенал ќе оствари победа, во 4. минута во судиското надополнување Чесите израмнија преку Томаш Холеш.
Реваншите по кои ќе бидат познати четирите полуфиналисти се на програмата в четврток од 21 часот.