Поради нападот на полицијата во Бањска на северот на Косово, приведени се шест лица и им е одредена мерка притвор во полиција до 48 часа, соопшти Специјалното обвинителство на Косово.
Во соопштението се наведува дека тие се осомничени за повеќе кривични дела, од кои едното е тероризам, пишува Klix.
Да потсетиме, вчера на северот на Косово во селото Бањска беа убиени еден косовски полицаец и тројца српски напаѓачи. Во нападот се ранети двајца полицајци. Полицаецот загинал во заседа кога отвориле оган врз полицајците кои дошле да постават барикада на влезот во селото, соопшти косовската полиција.
Со часови се слушаа истрели и експлозии. Косовскиот премиер обвини околу 30 маскирани и тешко вооружени напаѓачи за убиството на полицаецот од заседа, додавајќи дека тие се под контрола на официјален Белград.
Курти, откако косовската полиција ја стави ситуацијата под контрола, објави дека кај уапсените е пронајдено огромно количество воено оружје кое го користеле за планирање напади врз институциите на Косово. Курти рече дека полицијата конфискувала стотици пушки и муниција.
„Во денешната операција против вооружените терористи, косовската полиција заплени стотици пушки и муниција, вклучително и тешка воена опрема како што се митралези, гранати и друго. Нашата полиција останува во тесна соработка со КФОР и ЕУЛЕКС. Акцијата е во тек“, рече Курти.