Скоро 109 милиони гласачи денеска гласаат на претседателските избори во Русија, на 97.000 избирачки места, а во странство уште 1,8 милиони гласачи ќе може да гласаат на 394 избирачки места во 144 земји.
Една од нив требаше да биде Украина, но земјата им го попречи пристапот на руските државјани во земјата до гласачките места.
Портпаролката на руското Министерство за надворешни работи Марија Захарова ваквиот потег го оцени како „апсолутно незаконски“.
„Руските државјани кои планираа да гласаат во Украина со сопствени очи гледаат што се случува таму. Затоа нивниот избор би бил очигледен. Таков резултат на изразување на волја никогаш не би ги задоволил властите во Киев“, рече Захарова.
Руската новинска агенција ТАСС објави дека Украина не им дозволува на руските државјани да гласаат во дипломатските преставништва на Русија во земјата.
Захарова денеска рече дека киевските власти почнале да ги заплашуваат руските државјани уште пред денот на изборите за претседател на Русија, ширејќи гласини за провокации и насилство на гласачките места во руските дипломатски мисии.
Меѓутоа, истакна таа, кога стана јасно дека руските државјани сепак ќе излезат на гласање, властите во Киев се определија за мерки без преседан – блокирање на гласачките места.
ТАСС пренесува дека стотина припадници на силите за безбедност, како и украински националисти, го блокирале пристапот до влезот на Руската амбасада во Киев уште вчеравечер, проверуваат пасоши и пропуштаат само вработени во амбасадата.
Слична е ситуацијата и пред конзулатите во Харкив, Одеса и Лвив.